BACOLOD CITY- Ginklaro sang Bacolod City Police Office- Traffic Enforcement Unit nga wala malapakan sang container van ang Barangay Kagawad sang Barangay Banago sa bahin sang Purok Nami-Nami, kaina sang aga, adlaw sang Huwebes, Hunyo 13.
Ang biktima ginkilala kay Joemarie Maniego, 60-anyos, residente sang Riverside Zone sa amo nga barangay.
Samtang, ginkilala naman ang driver sang truck kay Rodrigo Ricarder, 59-anyos, kag residente sang Barangay 6A Villa Miranda, sa ciudad sang Victorias.
Base sa interview sang DYHB kay Police Major Ramil Sarona, head sang TEU, may karga si Maniego sang isa ka sako nga nga butane samtang nagamaneho sang motorsiklo.
Yara sa nawala nga bahin sang container van si Maniego nga natung-an sang center island nga pareho nagamaneho padulong sa Sur nga bahin. Santo sa imbestigasyon sang TEU, nasagaid ang karga nga sako sang biktima sa truck amo nga nadulaan ini siya sang kontrol kag natumba.
Napilpilan sang iya mismo nga motorsiklo si Maniego kag nalampos ang ulo sa semento nga nangin rason sang iya kamatayon, kag nahibaluan nga nagtabog ang helmet nga suksok sang biktima.
Dugang pa ni Pmaj. Sarona, posible nga may yara sang settlement sa tunga ni Ricarder kag pamilya ni Maniego, apang temporaryo ini nga nahunong sa Bacolod City Police Station 3.
