Sabton sang ciudad sang Bacolod ang pagpabulong sang kapin 35 ka mga manunudlo gikan sa Paglaum Elementary School nga naaksidente sa Don Salvador Benedicto (DSB) sakay ang city bus sang Hunyo 14, 2024.
Ang ini nga nga manunudlo ang nagbiyahe pa halin sa isa ka beach resort sa ciudad sang San Carlos para sa ila team building.
Madumduman nga isa ka Grade 3 teacher ang napatay matapos ini mapil-pilan sang natumba ang bus sa bahin sang Talos, barangay Igmaya-an, DSB.
Bangud sini, nagpasalig ang ciudad nga sila ang magahatag sang suporta sa mga pilason nga pasahero sang bus pinaagi sa Bacolod City Comprehensive Health Program (BaCHP). Buot silingon, wala na sang problemahon sa ila hospitalisasyon ang mga pilason.
Dala na diri ang ila bulong, laboratories, x-rays kag iban pa.
Ang Department of Social Services and Development (DSSD) ang maga-assess man sang iban pa nga kinahanglanon sang mga pilason kasubong man sa pag-facilitate sa releasing sang ila assistance.
Magapatigayon man sang imbestigasyon ang ciudad angut sa natabo nga insidente agud masiguro nga indi na ini maliwat pa sa dason.
