HINIGARAN- Patay ang driver kag angkas sini matapos magbungguanay ang duha ka motorsiklo sa Crossing Ba-o, Barangay Camba-og, banwa sang Hinigaran, pasado las-7 sang gab-i, adlaw sang Sabado, Hunyo 15.
Ang mga nagtaliwan ginkilala nga si Julius Cañete, 21-anyos, nagamaneho sang Honda XRM (Vehicle 1) nga motorsiklo kag angkas sini nga si Robert Namo, 20-anyos, lunsay mga construction worker kag residente sa banwa sang Hinigaran, samtang pilason man ang angkas nga si Jones Moreño, 23-anyos, residente sang Brgy. Sampinit ciudad sang Bago.
Ginamaneho naman ni John Michael Mendoza, 36-anyos, ang Honda ADV (Vehicle 2), kag angkas niya amo si Hazel Hogeboom, 43-anyos, lunsay residente sang Hinigaran. Base sa interview sang DYHB kay Police Master Sergeant Vedienold S. Peñalber, Investigator on Case sang Hinigaran PNP, nagikan sa Barangay Camba-og nanday Cañete padulong kuntani sa banwa sang Pontevedra, samtang nanday Mendoza padulong norte nagikan sa sur nga direksyon.
Gilayon nga nagliko si Mendoza, amo nga nabunggan ini sila ni Cañete nga nagresulta sang pagkabunggo sang duha ka motorsiklo.
Ginhingagaw dala sa ospital ang mga imbolbado sa aksidente apang pila ka oras nagkaligad nagtaliwan nanday Cañete kag Namo. Padayon pa ang pagpakig-angot sang mga kapulisan sa mga pamilya sang nagtaliwan kag mga imbolbado sa amo nga aksidente.
