SAN CARLOS CITY- Boluntaryo nga nagsungka sa mga kapulisan sang San Carlos City Police Station ang janitor sang Daisy ABC School nga nasunog lakip na ang property ukon ancestral house ni Mayor Renato Gustillo sa Barangay 5, ciudad sang San Carlos.
Ang amo nga janitor ginkilala nga si Recho Cabales nga nagsungka sadtong Sabado, Hunyo 15, isa ka adlaw matapos ang sunog. Base sa interview sang DYHB kay Police Lieutenant Colonel Nazer Canja, hepe sang amo nga estasyon, nahibaluan nga sa buluthuan nagsugod ang kalayo.
Gin-ako ni Cabales nga siya ang nagsunog sa buluthuan bangod nga gin-terminate siya kag ulihi na kuntani nga adlaw sa pagtrabaho sang Sabado.
Yara na sa kustodiya sang mga kapulisan si Cabales. Samtang base sa pahayag ni Fire Officer 3 Joseph Earl Solivio sang Bureau of Fire Protection-San Carlos City nga padayon pa ang ila imbestigasyon kag pagkolekta sang ebedensiya natuhoy sa insidente.
Ginklaro niya nga ulihi na nga gin report sang mga pumuluyo ang insidente, amo nga pag-abot nila sa lugar tuman na ka dako ang kalayo. Dugang pa ni Solivio, indi man matuod nga wala sang tubig ang fire truck sa pagresponde sang sunog.
