Maga-selebrar sang ika-86 nga charter day ang ciudad sang Bacolod subong nga adlaw, Hunyo 18, 2024. Kadungan sini ang pagpatigayon sang nagkalain-lain nga programa.
Pagasuguran ini sang isa ka civic-military parade las 7 sang sang aga sang apat ka mga grupo nga magahalin sa Barangay Bata, Alangilan, Mansilingan kag Sum-ag padulong sa Bacolod City Government Center (BCGC) para sa isa ka programa.
Las-5 sang hapon hiwaton ang Charter Day Awarding Ceremonies sa diin kilalahon ang eight outstanding employees sang ciudad, lima ka mga individual kag lima ka corporation top business taxpayers subong man ang lima ka individual kag lima ka corporation top realty taxpayers.
Magahatag man ang city government sang “Be the Change Award” kag “Ang Banwahanon Award.” Tanan ini hiwaton sa lobby sang BCGC.
Las 8 naman sang gab-i may Barangay Dance Festival sa BCGC Facade and Fountain Grounds. Subong nga adlaw, isa ka special non-working holiday sa Bacolod City sandig sa Republic Act 11146.
