Nag-isol ang proponent sang Public-Private Partnership (PPP) para sa Bacolod-Silay International Airport (BSIA).
Ini suno kay Captain Manuel Antonio Lamayo, Director General sang Civil Aviation Authority of the Philippines (CAAP).
Si Captain Lamayo ang nagsabat kay Iloilo City Mayor Jerry Treñas, Chairperson sang Infrastructure Development Committee (IDC VI) sang Regional Development Council angut sa status sang unsolicited proposal sang Iloilo International Airport kag Bacolod-Silay International Airport (BSIA).
Ang CAAP nagpabalo kay Mayor Treñas nga ang unsolicited proposal para sa Iloilo International Airport ang yara na sa negotiation stage kag ginalauman nga matapos sa Setyembre 3.
Ginpasiguro sang CAAP ang commitment sa timely execution sang proyekto. Samtang suno naman sa CAAP, ang first-in-line proponent para sa PPP sa BSIA ang nag-withdraw kag Original Proponent Status (OPS) ang gin-revoke na.
Apang ang second-in-line sa proyekto ang maga-submit pa sang proposal sa PPP Center. Madumduman nga sang 2020, isa ka Davao-based infrastructure firm nga Udenna Infra Corp. ang nag-proposed sang PPP sa provincial government sang Negros Occidental para sa BSIA.
Ang Udenna Infra Corp. ang nag-propose sang 40-year PPP para sa development sang airport kag pondohan ini sang P10.9 billion.
Kalakip kuntani sa plano ang expansion sang passenger terminal, extension sang runway kag introduction sang bag-o nga airport technologies lakip na ang improvement sang passenger experience.
