BACOLOD CITY- Gindayaw sang mga observers nagikan sa luwas sang pungsod ang pagpatigayon sang mga coast guard sang Pilipinas, Indonesia, kag Japan sang Marine Pollution Exercise (MARPOLEX) sini nga tuig 2024 sa ciudad sang Bacolod.
Nangin partisipante ukon observers sa amo nga exercise ang Korean Coast Guard, US Coast Guard Pacarea, National Southern Oil Spill Response (NASOS) sang Vietnam, International Narcotics and Law Enforcement Affairs (INL) Maritime Advisor, US Embassy, kag iban pa.
Base sa pahayag ni Lt. Commander Benjamin Mclyntre-Coble sang US Coast Guard Pacific Area, ginadayaw niya ang ginpakita nga effort kag pag-execute sang abilidad sang tatlo ka pungsod natuhoy sa firefighting, search and rescue, equipment recovery, damage assessment operations, oil spill recovery and containment, kag passing exercise.
Dugang pa ni Coble, nangin produktibo ang pagpatigayon sang MARPOLEX sini nga tuig 2024.
Kadungan sina, may panibag-o nga kasugtanan ang Pilipinas, Indonesia, kag Japan, amo ang bag-o nga kooperasyon sa pag mentinar sa pagprotektar sang mga importante nga baybayon kaangay sang Sulu kag Celebes Sea.
