Patay ang isa ka delivery boy nga nagamaneho sang motorsiklo matapos nga makabunggo sa isa ka Ceres bus nga sugata sini sa Sitio Buhian, Brgy. To-oy sa ciudad sang Himamaylan, las-3:50 sang hapon, adlaw sang Domingo, Hunyo 30.
Ang driver sang motorsiklo nga Kawasaki Barako 175 CC ginkilala nga si Hernan Panaligan, 41-anyos, kag residente sang Brgy. 3 Poblacion sa amo nga ciudad, samtang ang driver sang bus ginkilala nga si Julian Jenon, 48-anyos, residente sang Sitio Mombay, Brgy. Talacdan, banwa sang Cauayan.
Base sa interview sang DYHB kay Police Captain Arturo Margallo, Deputy Chief of Police sang Himamaylan City Police Station, ang bus ang padulong sa ciudad sang Bacolod nga yara sa inner lane sang National Road samtang si Panaligan ang naga-usoy sa pihak nga direksyon.
Nahibaluan nga hinali lang gin-agaw ni Panaligan ang dalan nga gina-usoy ni Jenon, amo nga nabungguan ini siya kag nakaagom sang pilas sa ulo kag tiil. Ginhingagaw dala si Panaligan sa Gov. Valeriano M. Gatuslao Memorial Hospital apang gindeklarar nga dead on arrival.
Dugang pa ni PCapt. Margallo, wala sang suksok nga helmet ang biktima sang nagluntad ang insidente. Padayon ang imbestigasyon sang mga kapulisan kun si Panaligan ang natulugan ukon yara sa impluwensiya sang makahulubog nga ilimnon.
Samtang boluntaryo nga nagsungka ang driver sang bus matapos ang insidente, kag temporaryo nga ginhunong sa Himamaylan CPS para sa nagakaigo nga disposisyon.
