Gin-reactivate sang Himamaylan City ang ila nga Barangay Bantay Peste Brigade bilang sabat sa pagpanghalit sang army worms sa mga katubuhan kag kamaisan.
Nagligad nga Hunyo 27 nagsapol ang city government sa Association of Barangay Captains kag City Agriculture Office (CAO) agod liwat buhion ang ila nga anti-pest program.
Gin-anunsiyo na sang city government nga ang ila pondo para sa third kag fourth quarter crop protection program ang gamiton na para sa pag-away sa pagpameste sang army worms.
Ginpaidalom naman ang mga barangay officials sa training course para sa pest and diseases identification kag management samtang ang ciudad ang nag-request naman sa Office of the Provincial Agriculturist (OPA) para sa drone nga gamiton sa pag-spray sa mga apektado nga lugar.
As of June 21, may yara na sang 64.65 hectares sang maisan nga yara sa vegetative stage sa tatlo ka mga barangay sa Himamaylan ang nahalitan na sang army worms sa diin 124 ka mga mangunguma ang apektado.
Kapin sa 50 porsyento sang 18.88 hectares sang pananom nga ginapanag-iyahan sang 55 ka mga mangunguma ang yara sa Brgy. San Antonio.
Samtang 54 percent naman sang 13.17 hectares sang apektado nga pananom ang yara sa Brgy. Mahalang kag 65 percent naman sang 32.6 hectares sang maisan ang nahamtang naman sa Brgy. Carabalan. Samtang 82 hectares naman sang katubuhan sa Himamaylan City ang apektado naman sang army worms.
