Nagapati ang Provincial Vice Chairman/Vice President sang National Movement of Young Legislators of Negros Occidental (NMYL) nga “well positioned” si 3rd District Congressman Kiko Benitez nga mangin secretary sang Department of Education (DepEd).
Sa interview sang DYHB kay Himamaylan City Vice Mayor kag NYML Provincial Vice Chairman/Vice President Justin Dominic Gatuslao, ang education background kag expertise ni Cong. Benitez ang isa na ka rason kon ngaa nagakabagay ini sa posisyon.
Nahibaluan nga antes pa man nagsulod sa politika si Benitez, nagserbe ini nga presidente sang Philippine Women’s University kag nakatudlo man sa University of Washington-Seattle.
Para kay Gatuslao, kon makapungko DepEd secretary si Benitez, matutukan sini ang madugay na nga problema sa educational system sang pungsod nga na-highlight pa sang pandemic.
Ini ang ginalakipan sang access kag kalidad sang edukasyon, suporta sa mga manunudlo kag investments sa learning environment sang pungsod. Dugang pa sang bise-alkalde, mas maayo kon mahapos palapitan ang DepEd secretary.
Nahibaluan nga ang NYML sa pagpamuno sang NYML Chairman/President Francis Frederick Palanca ang naga-endorso kay Benitez nga mangin tiglikom sang DepEd bulos sa nag-resign nga si Vice President Sara Duterte.
