BACOLOD CITY- Pilason ang e-bike driver matapos nga ginlampusan sang manughilot sa dalan Locsin sa ciudad sang Bacolod, gab-i sang Domingo, Hunyo 30.
Ang e-bike driver nga biktima ginkilala nga si Sonny Elisa, 48-anyos, kag residente sang Barangay Odiong banwa sang Moises Padilla, samtang ang suspetsado ginkilala nga si alias “Eric” isa ka manughilot.
Base sa interview sang DYHB kay Police Major Elmer Bonilla, Station Commander sang Bacolod City Police Station 1, naga-inom sang makahulubog nga ilimnon ang biktima sang nagpalapit ang suspetsado agod siya ang sabayan sa pag-inom, apang gintabog ini siya ni Elisa.
Ginkaakig ini ni Eric amo nga ginbalikan ini niya si Elisa kag ginlampusan sang wala mahibaluan nga bagay. Nakaagom sang pilas sa ulo si Elisa, kag nahibaluan nga yara man sa impluwensiya sang makahulubog nga ilimnon ang suspetsado sang natabo ang insidente.
Dugang pa ni PMaj. Bonilla, gin-refer nila ang amo nga reklamo sa barangay apang kun indi ini ma settle kag kun desidido si Elisa mag pasaka sang kaso, handa ang kapulisan nga mag assist sa biktima.
