BACOLOD CITY- “Madamo na ang na ubra, pero damo pa ang ulubrahon” ina ang ginbilin nga panaysayon ni Bacolod City Mayor Albee Benitez sa iya ginpatigayon nga speech sa State of the City Address, sini nga Miyerkules, Hulyo 3.
Nangin kabahin sa speech ni Mayor Albee ang iya pagpakamaayo nga wala na sang ghost employees sa iya nga administrasyon, kag on time na ang pag-duty sang mga empleyado sa Bacolod City Government Center.
Isa man sa nasuguran nga programa sang alkalde amo ang Bacolod Comprehensive Health Program (BacCHP) kun sa diin masobra 100,000 na ang nakarehistro diri kag kapin 50,000 na ang mga card holders. Nangin kalakip man sa BacCHP ang burial assistance nga ma akomadar sang 11 tanan ka mga funeral parlor sa ciudad.
Luyag man sang alkalde nga pinaagi sa BacCHP makarekta na padulong sa mga pharmacies agod magkuha ukon mag-claim sang libre nga bulong ang mga beneficiaries.
Ginpabugal man ni Mayor Albee ang bayad-agad, kun sa diin makuha sa gilayon sang mga beneficiaries ang mga bulig pinansiyal para sa ila. Padayon man ang paglab-ot sang alklade sang handom para sa ciudad nga “home for every Bacolodnon” pinaagi sa Pambansang Pabahay Para sa Pilipino (4PH) program.
Ginatingwaan man sang alkalde nga masolbar ang problema sa suplay sang tubig, manubo nga bili kag dekalidad nga suplay sang kuryente sa ciudad.
Gintumod man niya, nga wala lugar ang scammers kag fixers sa iya administrasyon.
Tuyo man ni Mayor Albee nga mas madamo ang mahatagan sang trabaho nga mga Bacolodnon pinaagi sa panibag-o nga investment ilabi na sa pagpatigayon sang Negros Island Region kaupod sang probinsya sang Siquijor.
Isa man sa ginatutukan niya sa iya administrasyon bilang alklade, ang pag-address sang climate change, kag iya nangin pamaagi agod makabulig sa environment amo ang pagpahamtang sang solar panels sa BCGC kag plano nga pagahamtangan ang 16 ka mga barangay, pag promote sang green routes ukon pagamit sang electric jeepneys, kag iban pa.
Aminado si Mayor Albee nga mabudlay malab-ot ang handom niya nga “Change” ukon pagbag-o agod mangin “Super City” ang ciudad apang nagapati ini nga kinahanglanon sang “Super People” agod malab-ot ini.
Super people nga Bacolodnon nga may right values, dynamic behavior, kag mas aktibo nga lifestyle. Suno pa sa alkalde, may pila ka mga indibidwal nga naga-kontra sa iya handom para sa ciudad, apang iya ini gina-respeto ang tagsa ka mga opinyon.
Para sa alkalde, long term benefits ang importante kag siya ang nagapati nga mas madamo ang naga-upod sa iya agod malab-ot ang handom para sa tanan.
Dugang niya, indi siya maga-untat mintras wala niya nabag-o para sa ikaamayo ang ciudad sang Bacolod.
