CALIFORNIA, USA – Nagalumapaw ang kalipay ni La Castellana Mayor Rhumyla Nicor-Mangilimutan matapos nga nangin kampeon ang Bailes de Luces Dance Group sa World Championships of Performing Arts nga ginhiwat sa Long Beach, California, USA.
Sa interview sang DYHB, ginpahayag ni Mayor Mhai nga madugay na sini nga handum nga madala sa international stage ang bugal sang ila banwa nga Bailes de Luces, nga ginalakipan sang mga dancers nga nagasuksok sang costume nga nagasiga samtang sila ang naga-perform.
Suno sa alkalde, na-overwhelm ini bangud magluwas nga nag-kampyon sila sa tanan nga divisions, sila pa ang nangin grand champion sa dance group category. Magluwas sini, nagdaog man si Analyn Pialan nga taga-Barangay Cabagnaan bilang silver medallist sa Open, Pop kag Rock Categories kag nagbaton sang balor $15,000 nga Degree Program Scholarship sa New York Conservatory of Dramatic Arts.
Si Pialan ang wala nakatambong sa iya graduation sa STI-WNU agud makaupod sa WCOPA. Ginklaro ni Mayor Mhai nga wala sang cash prize ang ila pagdaog apang ang medalya nga ila nabaton ang sobra pa sa kwarta bangud ang WCOPA ang mapaanggid sa Olympic Games sa patag sang performing arts.
Ang Team Philippines ang natalana nga magpauli sa Hulyo 15.
