BACOLOD CITY– Kapin duha ka tuig nagapanago sa ciudad sang Bacolod ang gina-alegar leader sang criminal syndicate ukon may kaso kriminal sa pungsod India.
Ang arestado ginkilala nga si Joginder Geong alyas Joginder Geyong ukon Kant Gupta, 40-anyos, kag temporaryo nga naga-istar sa isa ka subdivision sa bahin sang Barangay Taculing ciudad sang Bacolod.
Base sa interview sang DYHB kay Police Captain Dax Santillan, Station Commander sang Bacolod City Police Station 6, na-minitor sang intelligence group kag nakabaton sang tip ukon impormasyon ang mga kapulisan natuhoy kay Geong nga may kaso kriminal sa India. Bulig sang intelligence group, gilayon nga nag-koordinar sa Bureau of Immigration agod matigayon ang operasyon nga maaresto ang amo nga persona.
Nahibaluan nga tuig 2022 pa naga-tinir si Geong sa ciudad sang Bacolod agod magpanago. Santo sa monitoring sang mga kapulisan, wala sang kaso ukon rekord si Geong sa ciudad, apang ginkabig ini nga “undesirable alien” ukon indi citizen sa pungsod Pilipinas.
Si Geong ang may kaso kriminal sa India nga murder, attempted murder, extortion, robbery, kag isa sa makabig nga lider sa mga organisado nga crime syndicate. Ginsentensiyahan ang akosado nga pagpreso sa bilog niya nga kabuhi ukon life imprisonment bangod sa paglapas sa Arms Laws sa India.
Ginagamit ni Geong ang peke nga pangalan nga Kant Gupta sa Pilipinas nga may Nepalese passport. Naturn-over na ang akusado sa Bureau of Immigration kag yara na ini sa Manila para sa nagakaigo nga disposisyon kag posible nga pagpadeport sa iya.
