Arestado ang apat ka pangayaw nga mga mangingisda kag construction worker matapos nakuhaan sang masobra 77,000 packs sang smuggled nga sigarilyo sa Sitio Malabong, Brgy. 2, Ilog, Negros Occidental, las-1:45 sang hapon, Hulyo 10, 2024.
Ginkilala ang mga naaresto nga sanday Plong Ibnain, 18-anyos; Soji Toni, 19, pareho nga Pilipino kag Malaysian nga si Azwan Mohamad, 20, kag lunsay mga mangingisda.
Upod man nga naaresto sang mga ini si Junior Mahalial, 31, kag isa ka construction worker. Ang mga suspek ang lunsay residente sang Brgy. Diki, Isabela City, Basilan.
Nadakpan ang mga suspek nga naga-transport sang smuggled cigarettes halin sa Zamboanga sakay sang motorized banca.
Nakuha sa mga suspek ang 77,500 packs sang nagkalain-lain nga brands sang smuggled nga sigarilyo sa pagbinuligay sang gintingob nga pwersa sang Ilog Municipal Police Station, Philippine Coast Guard kag mga miembro sang Bureau of Internal Revenue (BIR) RDO 78, Binalbagan.
Suno sa hepe sang Ilog MPS, Police Major Joseph Partidas, wala sang gintudlo ang mga suspek nga mga indibidwal nga ila dagdagan sang mga pakete sang sigarilyo.
