Posible nga kontaminado ang water sample gikan sa Ilog-Hilabangan River nga ginpa-examine sa isa ka laboratoryo sa Bacolod City kasunod sang nagluntad nga fish kill sa Barangay 2, Ilog.
Ginpahayag ni Forester Lucia Salazar, Supervising Environment Specialist sa DENR-CENRO-Kabankalan, nga base sa resulta sang test nga ginpatigayon sang Negros Prawn Producers Cooperative Analytical and Diagnostic Laboratory, may mataas nga chloride level ang tubig gikan sa suba.
Apang, possible nga nakontaminar na ang water sample bangud nadugayan antes ini nausisa sa laboratoryo.
Nahibaluan nga June 9 na-monitor ang fish kill, June 10 sang nagkuha sang water sample apang June 14 na sang ini ang natsekyar sa laboratoryo.
Suno kay Salazar, kinahanglan nga mausisa ang water sample sa sulod lamang sang anom ka oras humalin sang ini ang ginkuha sa suba kag dapat sudlan sini.
Sa karon, nagaplano ang CENRO, upod sa Bureau of Fisheries and Aquatic Resources (BFAR), nga liwat magkuha sang water samples agud mahibaluan kun ano ang gintunaan sang fish kill.
Photos: Nicanor Lopez- Brgy 2 PB, Ilog
