BACOLOD CITY- Gina-paverify sa karun sang Bacolod City Police Office sa Land Transportation Office ang ginapanag-iyahan nga driver’s license sang Indian National nga nagapanago kag gin-aresto sa isa ka subdivision sa bahin sang Barangay Taculing ciudad sang Bacolod bangod ini ang gina-alegar leader sang criminal syndicate ukon may kaso kriminal sa pungsod India.
Ang arestado ang ginkilala nga si Joginder Geong alyas Joginder Geyong ukon Kant Gupta, 40-anyos, kag temporaryo nga naga-istar sa amo nga lugar.
Base sa interview sang DYHB kay Police Lieutenant Colonel Joery Puerto, BCPO Chief Investigator, nadiskubrihan nga Filipino ang nationality ni Geong sa iya nga driver’s license samtang ini ang Indian National kag may Nepalese passport. Nag-request sang verification sa LTO ang mga kapulisan agod mahibaluan ang driver’s license kun ini ang peke ukon lehitimo nga gin-issue sang ila talatapan.
Dugang pa ni PLt. Col. Puerto, kun lehitimo ang amo nga lisensya, ila pagahibaluon kun ano ang mga papeles nga ginpakita ni Geong; apang kun ini ang peke, ila hibaluon kun sin-o ang nagapameke diri sa ciudad.
Madumduman si Geong ang gin-aresto kag gindeport bangod ini ang may kaso kriminal sa India nga murder, attempted murder, extortion, robbery, kag isa sa makabig nga lider sa mga organisado.
