BACOLOD CITY-Naka-alerto sa karun ang Bacolod City Disaster Risk Reduction and Management Office (CDRRMO) sa pag-monitor sang panahon ilabi na sini nga habagat season.
Base sa interview sang DYHB kay Dra. Maria Laarni Pornan, head sang CDRRMO, magluwas sa ginapatigayon nga pagpanglimpyo sa mga drainages kag mga creek sa ciudad, ginpinturahan ang pila ka mga suba kag creek sa pagpahamtang sang Community-based Flood Early Warning System.
Makita nga ang early warning system sa bahin sang Lupit river, Mandalagan river, Banago creek, Mambuloc creek, Magsungay river, kag Sum-ag river. Kun yara na ang lebel sang tubig sa pinta nga yellow, ini ang nagapatiman sa pag-monitor sang kondisyon sang panahon; samtang kun yara ini sa orange, ini ang nagapaalinton sa mga pumuluyo sa posible nga pag-evacuate; kag ang red naman ang nagapatimaan nga mag-evacuate na ang mga pumuluyo nga yara malapit sa creek ukon suba.
Ang amo nga sistema ang makapa-alinton sa mga residente kag otoridad sa pagtaas sang lebel sang tubig, kag agod mas mangin epektibo kag mapasanyog ang pag-responde.
