Nakuhaan sang illegal nga armas luthang ang isa ka lalaki kadungan sa pagdakop sa iya kag upod sini nga nagapanahor sang illegal sa Purok Bangrus Barangay 1 ciudad sang Bacolod, adlaw sang Huwebes, Hulyo 11.
Ang arestado amo nanday Henry Murillo, 36-anyos, residente sang Purok Lubi Brgy. 3 sa amo nga ciudad, kag Elezandro Edem, 33-anyos, residente sang Brgy. Bunga banwa sang Don Salvador Benedicto.
Base sa interview sang DYHB kay Police Captain Glenn Montaño, Station Commander sang Bacolod City Police Station 2, samtang nagapatrolya ang mga katapo sang mga kapulisan sa lugar, ila nakita ang tatlo ka mga kalalakinhan nga nagahampang sang “cara y cruz” apang nakapalagyo ang isa sa ila.
Nagpatigayon sang rekisa ang mga kapulisan sa mga nagkaladakpan kag nakuha kay Murillo ang isa ka homemade .38 caliber revolver kag duha ka mga bala sang amo nga armas.
Dugang pa ni PCapt. Montaño, may rekord na si Murillo sa estasyon nga nagapalupok sang iya nga armas sa ila nga Barangay kag nangin imbolbado sa mga kinagamo.
Natigayon nga na-file ang kaso batok sa amo nga mga suspetsado, adlaw sang Biyernes, Hulyo 12, kag temporaryo nga nahunong sa Police Station 2 para sa nagakaigo nga disposisyon.
