Naaresto sang National Bureau of Investigation-Special Task Force (NBI-STF) ang duha ka mga suspek nga nagbaligya sang ginkawat nga Fernando Amorsolo Painting sa Hofileña Museum sa ciudad sang Silay sang Hulyo 3, 2024.
Sa statement ni Director Jaime B. Santiago, ang NBI-STF ang nakabaton sang impormasyon gikan kay a certain “Atty. Ching” nga nagabaligya sang 1936 ‘MANGO HARVESTERS PAINTING’ ni Amorsolo sa Quezon City sa balor nga P3.5 million.
Kasunod sini, nagpatigayon sang entrapment operation ang NBI sa pagpamuno ni Santiago. Kahapon, Hulyo 11, 2024 nagpadulong ang NBI operatives sa target area sa Tomas Morato, Quezon City sa diin matigayon ang baligyaanay sang painting.
Diri kag nadakpan ang mga subjects nga ginkilala nga sanday Ritz Chona Ching y Castro kag Donecio Somaylo y Escobia nga ginsugo ni “Atty. Ching”. Matapos nakumpirmar nga ang ginabaligya sang mga suspek, amo ang ginkawat nga Amorsolo painting, gin-aresto ang mga suspek sa paglapas sang P.D. 1612 ukon Anti-Fencing Law.
Ang mga suspek ang gin-presentar na para sa inquest proceedings sa Office of the Inquest Prosecutor, Department of Justice.
Ang nasambit nga painting ang gin-inspect naman sang National Museum of the Philippines kag gin-confirm nga ini amo ang ginkawat nga obra ni Amorsolo.
Nagalaum ang National Museum of the Philippines nga mabalik na ini sa pamilya Hofileña kag mapasakaan kaso ang mga suspek.
