Ginluthang patay ang isa ka lalaki nga pangayaw sa bahin sang National Highway sakop sang Barangay Balintawak ciudad sang Escalante, pasado las-3 sang hapon, adlaw sang Domingo, Hulyo 14.
Ang biktima ang ginkilala nga si Alfredo Sumaylo, 21-anyos, kag residente sang banwa sang Maria sa probinsya sang Siquijor. Base sa interview sang DYHB kay Police Lieutenant Colonel Albert Sy, hepe sang Escalante City Police Station, nahibaluan nga base sa ID ni Sumaylo, siya ang isa ka engine cadet operator sang EB Aznar Shipping Corporation sa Cebu.
Sa inisyal nga imbestigasyon sang mga kapulisan, sa pagpana-og ni Sumaylo sa tricycle, hinali ini siya ginla-ot sang wala pa makilal-an nga suspetsado kag ginluthang sang makapila ka beses gamit ang wala pa mahibaluan nga calibre sang armas, kun sa diin ang biktima ang nakaagom sang pilas sa iya nga likod kag ulo nga gintunaan sang iya kamatayon.
Gina-alegar nagasuksok sang pula nga helmet, itom nga jacket nga may puti nga tshirt sa sulod, maong nga short, kag naka-tsinelas ang suspetsado. Narekober sa crime scene ang isa ka deformed slug, tatlo ka basiyo sang caliber .40, kag isa ka live ammunition sang caliber .40.
Dugang pa ni PLt. Col. Sy, gilayon nga nagdalagan ang suspetsado, nga ginapatihan nagpadulong sa iya motorsiklo nga nakapark kag nag-usoy sa dalanon padulong Toboso. Gilayon man nga nagpahamtang sang checkpoint ang Escalante CPS sa Brgy. Jonob- Jonob kag nagpabalo sa kaingod nga mga police station sang ciudad sa posible nga pag-aresto sa suspetsado.
Padayon ang imbestigasyon sang mga kapulisan kun ngaa yara sa ciudad ang biktima, kag kun ano ang motibo sa krimen.
