BACOLOD CITY- Wala sang kinamatarong nga magpa-utod sang suplay sang kuryente kag tubig sa mga tenants sang Manokan Country ang Local Government Unit sang ciudad sang Bacolod suno sa legal consultant sang mga vendors.
Base sa pahayag ni Atty. Brick Reyes, legal consultant sang Manokan Country nga base sa City Ordinance No. 16 Series of 1983 Section 4 – nga ang tanan nga electric kag water billl ang exclusive account sang mga stall owners.
Ginklaro ni Atty. Reyes, nga ang suplay sang tubig kag kuryente ang wala nakapangalan sa ciudad kundi sa tagsa ka mga manug baligya.
Apang wala nagapati ang legal consultant nga iga-cut off sang CENECO kag BACIWA- Primewater ang suplay sa Manokan Country ilabi na kun wala nag agi sa legal nga pamaagi.
Una na nga ginpahayag ni Bacolod City Legal Officer Head Atty. Romeo Carlos Ting Jr., nga ila na na-inform ang BACIWA-Primewater kag CENECO angot sa pagpa-untat sang tubig kag powersupply sa Manokan bangud man sa patigayunon nga redevelopment project sang SM Prime Holdings.
