BACOLOD CITY- Maga-file sang complaint nga Nullification of Lease and Agreement ang mga tenants sang Manokan Country batok sa Public Private Partnership sang Bacolod City Government kag SM Prime Holdings subong nga adlaw, Hulyo 16.
Ini kadungan sang natalana nga pagpasira sang city government sang Manokan Country subong nga adlaw.
Base sa pahayag ni Atty. Jomax Ortiz, legal consultant sang Manokan Country vendors, luyag nila nga iga-nullify ang lease and agreement bangod wala sang may ginpatigayon nga public bidding, amendment contrary to law and existing ordinances, kag iban pa ang ciudad.
Dugang sina may anom pa ka rason ang mga vendors kag mga legal consultant natuhoy sa pag-file sang amo nga complaint kag ini ang paglapas sa City Ordinance nga pagpasira sang Fr. Ferrero St, tuyo nga pag-demolish sang manokan country, pagguba sang vendor’s plaza, pagpahanugot sa masobra 25 ka tuig nga lease agreement, pagtandog sang BAYS center nga kuntani sakop pa ini sang Bacolod City Public Plaza kag paglakip sini sa commerce of man ukon paglakip sini sa mga commercial transactions.
Ginkwestyon man ni Atty. Ortiz ang advance rental fee sang SM nga naga balor P125,000,000 nga dapat magasugod pa ang pagbayad sini matapos pa ang renovation sang Manokan Country.
Nagpahangkat man sang debate si Atty. Oritz kag Atty. Brick Reyes sa mga government officials sang ciudad agod mahibaluan sang mga pumuluyo ang kamatuoran natuhoy sa pagpatigayon sang PPP.
