WORLD NEWS- Patay ang anom ka mga persona lakip na ang isa ka pulis kag 28 tanan ang pilason matapos ang pagpangluthang malapit sa Shia mosque nga nahamtang sa Muscat sa pungsod Oman.
Base sa statement sang mga otoridad, ang tatlo ka mga suspetsado sa pagpang-atake ang napatay sang mga security forces.
Wala na naghatag sang dugang nga detalye ang mga kapulisan natuhoy sa pagkakilanlan sang mga biktima, gunmen, kag ang motibo sa krimen.
Suno kay Prime Minister Shehbaz Sharif sang Pakistan, nalakip sa mga nagtaliwan ang apat ka mga Pakistanis, kun sa diin iya ginakasubo ang amo nga hitabo.
Ginmanduan man ni PM Sharif ang embahada sang Pakistan sa Muscat nga ihatag ang tanan nga posible nga bulig sa mga napilasan kag personal nga padulongan sa ospital.
