Mainit nga ginsug-alaw ang Bailes de Luces dancers sa ila nga pag-abot sa Bacolod-Silay airport kagab-i, Hulyo 16, 2024 gikan sa ginpatigayon nga World Championship of Performing Arts (WCOPA) nga ginhiwat sa Long Beach, California sa pungsod America.
Ang delegasyon ang ginpangunahan ni Mayor Alme Rhummyla G. Nicor Mangilimutan. Nangin emosyonal naman si Mayor Mangilimutan sa ila nga pag abot bangud suno sa iya nga natuman gid ang iya handum nga kilalahon ang Bailes de Luces inde lamang dirI sa Pilipinas kundi sa bug-os nga kalibutan.
Nagadangat sa 60 ka mga pungsod ang nangin kasumpong sang Bailes de Luces nga nagrepresentar sang Pilipinas.
Ginkilala ang Bailes de Luces nga amo ang nangin Senior Grand Champion Dance Group of the World. Magluwas nga nangin kampyon ini nakakuha pa gid sila sang finalist medal, semi-finalist medal, champion of the world division winner – contemporary, champion of the world division winner – folkloric, champion of the world division winner – open, contemporary group dance – gold, folkloric group dance – gold, kag open Group dance – gold.
Samtang isa naman ka programa ang ginpatigayon sa banwa sang La Castellana bilang pag sug-alaw sa ila nga pag abot may yara sang banda nga magalingaw sa mga pumuluyo samtang nagahulat kag nagtakop ang programa paagi sa fireworks display.
