BACOLOD CITY- May rekord nga pagpa-blotter batok sa contractor nga gintiro-patay sa Purok Masagana, Barangay Sum-ag ciudad sang Bacolod pasado ala-una kaina sang hapon, Hulyo 16, sa kaso nga estafa kag ini ang naserbehan man sang demand letter.
Ang biktima ang ginkilala kay Gregg Alvin Gelito, isa ka contractor kag residente sang Alunan Baybay, Barangay 35 diri sa ciudad sang Bacolod.
Base sa interview sang DYHB kay Police Captain Michael Tuburan, Station Commander sang Bacolod City Station 9 padayon ang ila nga pagpangusisa natuhoy sa background sang biktima agod matumod ang motibo sa krimen.
Nadiskubrihan sang mga kapulisan nga may nagpa-blotter sadtong Hulyo 2022 kay Gelito sa Boracay, Aklan sa kaso nga estafa kag paglapas sa bouncing check law.
Nahibaluan man nga sadtong Enero 2024, nakabaton sang demand letter ang biktima sa isa ka construction supply bangod sa utang nga kapin P800,000.
Sa karun padayon ang imbestigasyon sang mga kapulisan sa amo nga insidente.
