Final na nga gindesisyunan sang ciudad nga indi na pagdayunon ang pagpakay-o sang Burgos Public Market, ini ang ginkumpirma ni Sangguniang Panlungsod Committee Chair on Markets nga si Councilor Celia Flor. Suno kay Flor, una na nga ginpahayag sa ila ni Mayor Albee Benitez nga ginkulang ang budget nga gintalana para sa construction sang Legislative building kag Old City hall.
Paathag ni Flor nga kun may official request na halin sa alkalde nga ire-align ang budget nga para kontani sa Burgos Market, kinahanglan pa ini magsunod sa insakto nga proseso kag maglabay sa konseho agud ma-amend ang listing sang loan contract.
Agud ma-repair naman ang problema sa merkado kaangay sa nagatulo nga atop kag guba nga septic tank, pagakuhaon naman ang budget sa trust fund sang ciudad.
Ang ini nga trust fund amo ang collection sang ciudad sa arkila sa merkado, apang problema lang bangud gamay ang collection kag madamo pa sang wala mabayaran nga arrears sa karon. Una na ginreport nga sa kapin 343 ka mga actual occupants sa Burgos Public Market, 328 diri and nag boto sang “NO” sa renovation.
