Ginkalipay sang mga tenants sa Manokan Country ang bag-o nga mga nahisugtan sa Bacolod City government.
Sa nahibaluan nga ginpahanugutan sang ciudad sang Bacolod nga magbukas ang Manokan Country tubtob Agosto 19 apang kadungan sini nagpasalig na ang mga tenants nga maga amat-amat himos kag saylo sa temporaryo nga pwesto sa SM sumugod bwas nga adlaw tubtob Hulyo 31. Ini matapos nagdesisyon ang ciudad nga siraduhan na ang Manokan Country kahapon.
Sa interview sang DYHB kay Atty. Jomax Ortiz, legal council sang mga tenants, nagpasalamat sila sa city government bangud sang mga nadihon nga win-win solutions kadungan sang closed door meeting nga ginpatigayon sa tunga nila sang city officials.
Suno kay Atty. Ortiz, nalakip sa na-istoryahan amo ang pagpahanugot sa 24 ka mga tenants nga makasaylo sa SM City bisan pa ang may mga arrears. Nahisugtan man ang condonation sa surcharges kag interest sa mga arrears sang tenants sa city government kag ginpalawig pa ang tiempo agud sila ang makabayad. Ginkalipay man sang mga tenants ang malapad nga lugar nga ginhatag sang SM City lakip na ang limpyo nga banyo.
