BACOLOD CITY- Patay ang isa ka lolo sa sulod sang presohan nga may kaso nga pagpanghurikap sa iya mismo nga apo sa isa ka lugar sa ciudad sang Bacolod matapos nga gina-alegar nag-utas sang kaugalingon nga kabuhi sadtong Hulyo 15, 2024.
Ang biktima sang amo nga insidente ang isa ka babaye nga naga-edad 15-anyos, samtang ang suspetsado ang naga-edad naman sang 56-anyos.
Base sa eksklusibo nga nakuha nga impormasyon sang DYHB sa iloy sang biktima nga hinablos sang suspetsado, nag-sulod ang suspetsado sa kwarto samtang naga-isahanon ang biktima nga nagakatulog kag iya ini ginhurikap ang pag-ibabaw nga parti sang lawas ka biktima.
Sang nabatyagan sang 15-anyos ang amo nga aktibidad sang iya lolo, iya ini ginpahog nga siya ang igasugid sa iya nga iloy nga natabuan yara ini sa Mindanao, amo nga gilayon nagpalagyo ini.
Nag-desisyon ang iloy nga mag-file sang kaso bangod masami nga nagapanglingling sa sulod sang ila balay, gina-stalk ang bata niya, kag nagapamahog nga sila ang pagapatyon sang suspetsado.
Natigayon nga maaresto ang suspetsado sadtong Hulyo 6 sa nagakaigo nga reklamo sa isa ka police station sa ciudad.
Dugang pa sang utod sang suspetsado, may deperensiya sa paminsaron ang suspetsado amo nga nahimo ang amo nga mga aktibidad. Nagapati ang pamilya nga gin-utas sang suspetsado ang iya mismo nga kaugalingon nga kabuhi pinaagi sa pagbitay nga nagaluhod gamit ang higot sang iya nga short sa sulod sang presohan samtang nagakatulog ang kaupod nga mga preso.
Natalana kuntani sadtong Hulyo 16 nga adlaw nga sila ang maga-atubangay sa korte para sa hearing. Hungod nga wala na ginhingadlan ang mga imbolbado sa insidente kag lugar kun diin ini natabo.
