PROVINCIAL CAPITOL – Nagdangat sa malapit 1,000 ka mga indibidwal ang naserbisyuhan sa ginpatigayon nga caravan sang Professional Regulations Commission kag National Bureau of Investigation sa 5th District sang Negros Occidental sadtong Lunes tubtob Myerkules.
Ginpahayag ni 5th District Congressman Atty. Dino Yulo nga naglab-ot sa 1,278 ka mga indbidwal nga may multiple transactions ang naserbisyuhan sang PRC samtang malapit 500 man ang natatap sang NBI sa dungan nila nga caravan sa congressional office ni Yulo sa banwa sang Isabela.
Suno kay Cong. Dino, kalabanan sa mga na-cater sang PRC ang mga maestra kag professional nga nagpa-renew sang ila mga lisensiya, subong man ang mga bag-ong pasar sa licensure examinations nga nagpa-register sa PRC kag mga naga-apply agud magkuha sang Board exam.
Sa NBI naman, kalabanan sa mga nahatagan sang NBI clearance ang mga first time job-seekers samtang may iban man nga nagpa-renew. Ginpabutyag ni Cong. Dino nga malipayon ang iya mga constituents bangud paagi sa iya talatapan, mas naglapit ang mga serbisyo sang gobyerno.
