WORLD NEWS- Pormal na nga nagpungko ang bag-o nga hari sang pungsod Malaysia nga si Sultan Ibrahim, sa ginpatigayon nga seremonya sa National Palace nga nahamtang sa Kuala Lumpur.
Nangin kabahin sa amo nga seremonya nanday Prime Minister Anwar Ibrahim, miyembro sang gabinete, foreign dignitaries, kag pila ka mga dinapit nga bisita, lakip na si Sultan Haji Hassanal Bolkiah sang Brunei, kag King Hamad bin Isa Al Khalifa sang Bahrain.
Base sa royal address sang hari, nagpasalig si Sultan Ibrahim nga magaserbisyo sang may pagkatampad, sinseridad, pagkamatarong, kag may kaluoy sa mga pumuluyo sang pungsod.
Ang Malaysia ang isa ka constitutional monarchy, nga may siyam ka mga sultan ukon rulers, nga nagapamuno sa tagsa ka mga estado kag bilang religious leader, kag sila man ang nagabulos-bulos sa pagpangalagad bilang hari sa sulod sang lima ka tuig nga termino.
