BACOLOD CITY- Nangin benepisyaryo ang kapin 700 ka mga Persons Deprived of Liberty (PDL) sang probation, parole, kag conditional pardon sa ciudad sang Bacolod.
Base sa pahayag ni Mark Thaddeus Tanalgo, Probation and Parole Officer Chief sang Bacolod Parole and Probation Office 2 sa bahin sang Hall of Justice, magluwas sa 700 nga mga kliyente nila, may dugang pa nga mga 500 ka mga petitioners nga naga-apply sa karun sa amo nga prebilehiyo agod maka-upod ang ila mga pamilya sa guwa sang presohan.
Yara sa 75% sa mga nahatagan ukon naka-avail sang probation sa ciudad amo ang may kaso nga paglapas sa Republic Act 9165 ukon Comprehensive Dangerous Drugs Act of 2002.
Ang Parole and Probation Office (PPO) ang yara sa idalom sang ahensiya sang Department of Justice, kun sa diin sila ang naga-manage sang mga indibidwal nga nahilway sa presohan bangod sa probationary, parole, kag conditional pardons, pinaagi community base rehabilitation kag indi sa sulod sang presohan.
Apang indi tanan nga mga PDL’s ang mahatagan sang amo nga prebilehiyo bangod may yara sang mga qualifications, kun sa diin dapat ang kaso ukon krimen nga nahimo ang wala nagalapas sa national security, ginpamatbatan sang indi maglapaw sa anum ka tuig nga pagkapreso, kag wala pa nakaagi avail sang probation.
Antes pa man maka-avail ang amo nga persona, nagapatigayon ang PPO sang imbestigasyon kag report kun ang isa ka PDL ang qualified sa amo nga prebilehiyo ukon indi, apang korte na ang nagadesisyon natuhoy diri.
Ginasiguro man sang PPO nga ang maka-avail sang probation ang ila mamonitor nga indi na imbolbado sa anuman nga krimen, kag sila ang naga-bisita sa probation officer, at least once a month.
Dugang pa ni Tanalgo, sini nga bulan sang Hulyo, ang ila nga talatapan ang nagasaulog sang ika-48 nga anibersiyaryo kun sa diin sila ang nagapatigayon sang information drive sa mga barangay community, therapeutic activity, bloodletting, clean up drive, kag skills training.
| File photo from Rappler
