SAN CARLOS CITY- Gina-alegar aksidente nga natiruhan sang isa ka miyembro sang Special Weapons and Tactics (SWAT) ang kaugalingon gamit ang service firearm nga 9mm pistol, kaina sang kaagahon, adlaw sang Domingo, Hulyo 21, sa bahin sang Barangay Rizal, ciudad sang San Carlos.
Base sa interview sang DYHB kay Police Lieutenant Colonel Nazer Canja, hepe sang San Carlos City Police Station, upod sang biktima ang iya nobya kag utod sang iya nobya sang natabo ang amo nga insidente.
Sa inisyal nga imbestigasyon sang mga kapulisan, gina-alegar nga samtang naga-istoryahanay ang biktima kag nobya sini, nahulog ang armas, amo nga ginpulot ini sang iya nobya, kag gilayon nga ginkuha sang biktima.
Ginapatihan nga loaded ang armas, amo nga pagkuha sang biktima sang armas sa iya nobya, gina-alegar nga aksidente nga na-pull sang biktima ang trigger nga nagresulta sa pagkaigo sa iya nga sag-ang.
Dugang pa ni PLt. Col. Canja, wala sang pag-ilinaway ukon komusyon nga nagluntad sa tunga sang biktima kag sa iya nga nobya.
Yara sa karun ang biktima sa isa ka ospital sa ciudad sang Bacolod para sa nagakaigo nga pagbulong.
Hungod nga wala ginhingadlan sang hepe ang mga imbolbado sa amo nga insidente.
