Ginkumpirmar sang commander sang Police Station 4 nga ila na-imbitahan ang gina-alegar Chinese-looking nga babayi nga nagpangkuha sang litrato kag nagapangbakal sang valid ID sang mga tricycle driver sa Brgy. Vista Alegre, Bacolod City sini nga bulan sang Hulyo.
Suno kay Police Captain Francis Depasucat, apisar indi dapat dal-on sa police station ang babayi bangud wala sang reklamo batok sa iya, iya ini gin-imbitahan agod maistorya kasunod sang gina-alegar pagpangbakal kag pangpangkuha sini sang litrato sang valid IDs sang mga traysikol driver.
Suno kay Depasucat, nagpahayag ang babayi nga gamiton niya sa GCash ang litrato sang mga IDs kabaylo sang inugpamahaw. Apang suno kay Depasucat wala man sang traysikol driver nga nagreklamo batok sa babayi.
Sa pag-usisa sang PS 4, taga-Mansilingan ang babayi, yara sa 20’s ang edad kag may negosyo sa isa ka mall sa Dalan Gatuslao. Makahibalo man ini maghambal sang Hiligaynon kag Filipino. Nahibaluan nga ang National Bureau of Investigation (NBI) ang naga-verify naman sang identity sang nasambit nga babayi.
