Lubog sa gihapon sa baha ang kapin 30 ka mga panimalay sa Purok Paraiso, Barangay Banago bangud wala na sang gwaan ang nasupot nga tubig ulan sa ila mga lugar.
Ginpahayag sang isa ka residente nga nalipay na sila kun tani bangud gilayon nga gin-aksyunan ang ila nakaligad nga reklamo sa DYHB Sentro Serbisyo apang ini gali tanan, band aid solution lang!
Sa una nga reklamo sang mga pumuluyo, gilayon ginpaubrahan sang kalog sang Yuhum Housing contractor ang isa ka area sa Purok Paraiso agud may alagyan ang tubig pagwa sa baybay.
Nagnubo gid man matuod ang baha apang sang nag sige-sige na ang pag-ulan nakaligad nga semana, didto liwat nga nag saka ang tubig sa ila kag ang ginpaubra nga gamay nga kalog ang indi na makasustiner pa agud maka gwa ang tubig.
Karon, taga tuhod na ang tubig baha sa ila mga puluy-an.
Una na nga ginatudlo nga rason sang mga ini, amo ang ginaalegar gintampukan nga tamburong bangud naman sa ginakay-o nga area para sa Yuhum Housing sa idalom sang contractor sini nga pamilya Gonzalez.
Panawagan sang mga pumuluyo sa lugar nga kun mahimo, pamatian man sila sang ila Punong Barangay kag mismo sang ciudad bangud seryoso ini nga problema.
Dugang pa sang mga ini nga ginaproblema nila karon ang kabudlay sa ila paghulag bangud magabalik eskwela na ang klase ila mga kabataan sunod nga semana dugangan pa ang ila kakugmat subong nga nagadamo naman ang kaso sang dengue.
