Magasugilanon ang city government sa mga punong barangay sa Bacolod para sa awareness sang ginaalegar pagpamakal ID sang isa ka babayi nga Chinese.
Nahibaluan nga nagpangayo na sang bulig si Mayor Albee Benitez sa National Bureau of Investigation (NBI) angut sa ginaalegar pagpamakal sang isa ka ginapatihan Chinese nga babayi baylo sa pag picture sang mga ID sang pila ka mga Bacolodnon.
Sa interview kay City Legal Officer Atty. Romeo Carlos Ting Jr, ginpahayag sini nga magluwas sa pag-tap ni Mayor Albee sa NBI, sila ang magasugilanon man sa tagsa ka mga Punong Barangay sa ciudad agud mangin aware ang mga ini inkaso may mga kaangay nga scheme sa ila mga lugar.
Suno pa kay Ting, ang mga impormasyon nga yara sa ID ang dapat halungan kag wala ginahatag sa kun sin-o lang.
Dugang pa sini, kun gamiton sa iligal nga buluhaton ang personal nga impormasyon sang mga tag-iya sang ID nga ginpicturan, sila man sa gihapon ang manabat sa layi.
Una na ginreport nga isa ka Chinese-looking nga babayi ang nagapangkuha sang litrato kg nagapangbakal sang valid ID sang mga tricycle driver sa Barangay Vista Alegre sa balor nga P200-P400.
