Ginpasakaan si La Castellana Mayor Alme Rhummyla Nicor-Mangilimutan sang kaso nga graft and corruption sa Office of the Ombudsman sang iya anay salaligan kag anay empleyado sang banwa.
Hulyo 12, 2024 sang ginpasaka ni Elvin Dela Fuente sang Brgy. Manghanoy, La Castellana ang kaso batok sa alkalde.
Sa interview sang DHB kay Dela Fuente, ang kaso nga ginpasaka niya ang base lamang sa iya nahibaluan nga mga anomaliya sang siya ang empleyado pa sang banwa. Suno kay Dela Fuente, madamo sang ghost employees ang banwa, mangin ang mga private employees sang alkalde sa iya nga baligyaan, iya labandera, masahista kag bantay sang iya apo sa banwa nagakuha sang sweldo. Lakip man diri ang nagapamumod manok sang miembro sang pamilya sang alkalde.
Dugang pa ni Dela Fuente, mangin ang iya pamilya ang nangin benepisyaryo sang anomaliya sang banwa lakip na ang iya iloy. Suno diri, may yara sang programa ang banwa nga carabao dispersal antes siya nag-resign sang 2019 sa diin ang iya iloy ginpapirma niya sa voucher nga P25,000 ang benepisyo apang P5,000 lamang ang nabaton sa beneficiary apang wala sang carabao nga ginhatag. Suno kay Dela Fuente, napulo niya ka kilala ang iya mismo ginpapirma sa kaangay nga voucher.
Si Dela Fuente ang anay salaligan ni Mayor Nicor-Mangilimutan halin sa first term sini. Sang yara pa siya sa banwa, in charge ini sa medical and financial desk apang nag-resign ini sang 2019 bangud nagpangita ini trabaho sa Manila. Gin-athag ni Dela Fuente nga wala sila sang lainay sang buot sang alkalde sang nag-resign ini sang 2019. Apang naglain ang buot sini sang Abril 2024 bangud nga ang page sang banwa nga Arangka La Castellana ang nagdalahig sang iya ngalan sa mga liquidation reports. Suno kay Dela Fuente wala man lang ginsaway sang alkalde ang mga admin sang page.
Magluwas sa kaso sa Ombudsman, nag-request man si Dela Fuente sa Office of the President, mga opisina nanday Sen. Risa Hontiveros, Raffy Tulfo kag Senate President Francis Escudero nga magpatigayon sang lifestyle check kay Mayor Nicor-Mangilimutan.
