Ginpondohan sang Brgy. Pahanocoy, Bacolod City ang duha ka mga flood warning device sa ila duha ka mga taytay agod madasig ang pagpahibalo sa mga residente sa tion sang pag-inulan.
Suno kay Punong Barangay Yolanda “Bebeng” Noble, sang bulan sang Marso nagbakal ang barangay sang warning device kag ini ang ginbutang sa Cabugwang kag Cabalagnan bridges sa diin ang may siren kag CCTV nga konektado sa barangay hall agod hapos ang pag-monitor sa pagsaka sang tubig. Suno kay Noble ang pondo para sa diri ang halin sa ila nga DRRM kag development funds.
Aminado si Noble nga kaangay nga catch basin ang ila barangay particular ang Purok Hanap Buhay kag Maninihon nga ginakabig nga flood prone.
Sa pihak nga bahin ginpasalamatan ni Noble ang madasig nga paghatag atensyon ni Councilor Pao Sy kag sang CDRRMO sa problema sang drainage system sa Pahanocoy Baybay Elementary School nga naga-resulta sa pagbinaha.
