Ginkalipay sang pila ka mga vendors sa Sum-ag Public Market ang ila pagbalik sa pagbaligya sa sulod sang merkado matapos ang kapin tatlo ka tuig nga pagpatukod sini sumugod sadtong tuig 2021.
Base sa interview sang DYHB kay Remia Mercado, manugbaligya sa amo nga merkado, iya ginkalipay ang pagbalik niya sa sulod, kun sa diin mas nakaplastar ini siya sa pagbaligya sang mga utan kag lamas.
Indi naman maga-problema si Mercado, kun may pag-ulan sa lugar kun sa diin nagaresulta sang pagdanaw sadto sa iya nga pwesto sa gwaan.
Dugang pa ni Mercado, ginhatagan sila sang numero kun sa diin sila nga bahin sang merkado magabaligya.
Una na nga ginsiling ni Punong Brgy. Rodney Carmona, nga ang arkabala, ang nakadepende sa pwesto sa merkado kun sa diin ang fish kag vegetables section ang tig-₱20; dry goods section tig-₱30; meat section tig-₱50, kag rice section ang tig-₱70. Ang amo nga merkado ang ginpondohan sang kapin ₱65 milyon nga budget. Sa karun naga amat-amat na saylo ang mga vendors, sumugod sadtong Domingo nga adlaw, Hulyo 29.
