Yara na sa estable nga kondisyon ang lalaki nga naluthangan sang pulis kag bystander nga nasalabat sa Purok Orchids, Barangay Haba, Candoni, Negros Occidental.
Sa interview sang DYHB kay Police Major Ruel Culanag, hepe sang Candoni Municipal Police Station, nagresponde si Corporal Eric Rodrigo matapos nga ginreklamo ang suspek nga si Laurito Labrador, 35-anyos bangud nga nagapangguba ini sang windshield sang delivery van.
Gin-negosyar sang alert team si Labrador kag ginhingyo nga buy-an ang iya binangon. Apang ginlagas pa sini si Corp. Rodrigo rason nga napilitan ini nga gamiton ang iya service firearm. Naigo sa paa ang suspek kag ang bystander nga si Angelito Dela Cruz, 25-anyos sang Brgy. Camindangan, Sipalay City.
Ang suspek gindala sa Corazon Locsin Montelibano Memorial Regional Hospital samtang ang bystander sa Kabankalan City District Hospital kag pareho na nga nagapaayo.
Suno kay Culanag, kaso nga Direct Assault upon an Agent of Person in Authority ang ipasaka batok sa suspek.
