SIPALAY CITY-Na-claim na sang pamilya ang bangkay sang ginapatihan katapo sang rebelde nga napatay sa nagluntad nga engkwentro sa Sitio Cambo-giut Barangay Camindangan ciudad sang Sipalay, sadtong Agosto 1.
Base sa interview sang DYHB kay Lieutenant Colonel Brian Bagaipo, 15th Infantry Battalion Commander, ginkilala ang amo nga rebelde nga si Alvin Sensano alias ‘Ka Zian’ , 34-anyos, kag residente sang Pinggot sa banwa sang Ilog.
Aminado ang iloy ni Sensano, nga ang duha ka bata niya ang mga katapo sang New People’s Army, apang ulihi na niya nahibaluan nga nag-upod ang mga ini sa hublag.
Suno kay Lt. Col. Bagaipo, baton sang iloy nga nagtaliwan ang iya bata sa nagluntad nga engkwentro, apang iya gina-kasubo nga nagbato pa si Sensano sa mga katapo sang militar nga nangin rason sang iya kamatayon.
Nahibaluan nga si Sensano ang head sang taxation implementing group sang mga remnant sang South West Negros Front kun sa diin siya ang nagapang-kolekta sang mga supporta nagikan sa mga sibilyan ukon mga pumuluyo sa lugar.
Ginkabig nga ang pagkadula ni Sensano ang may dako nga epekto sa grupo sang mga rebelde.
Madumduman sadtong Hulyo 31 sa kapareho nga barangay, si Regie Fundador, isa man ka katapo sang rebelde ang nagtaliwan man bangod sa nagluntad nga engkwentro.
