PROVINCIAL CAPITOL – Nagalaum si Governor Bong Lacson nga makumbinser sang mga district congressmen sa Negros Island Region ang National Government nga ilakip ang bag-ong tukod nga rehiyon sa 2025 General Appropriations Act.
Ang pahayag ni Lacson ang kasunod sang pag-aku ni Senator Imee Marcos nga wala malakip ang NIR sa proposed GAA para sa madason nga tuig.
Una na nga ginpahayag ni Senator JV Ejercito, nga amo ang principal author sang layi nga nagatukod sang NIR, nga ginarekomendar ang tuigan nga P1.2 billion nga budget sa madason nga tatlo katuig nga magamit sa pagpatukod sang mga talatapan sang gobyerno sa idalom sang bag-o nga rehiyon.
Suno kay Governor Lacson, nakahibalo na sila nga wala malakip ang NIR sa 2025 budget apang karon nga yara na sa Kongreso ang proposed budget, nagalaum ini nga madinalag-on nga maduso sang mga mamalidha nga matigan-an man sang pundo ang NIR.
Gintalana sa Agosto 9 sang hapon ang meeting NIR Technical Working Group kag nagalaum si Lacson nga malakip ang budget sa pagatalakayon.
