CALATRAVA- Ginlabo-patay ang isa ka fish vendor nga nagapanukot sang utang nga ₱2,000 nga balor sang isda sa Sitio Ecogan, Barangay Minapasuk, Calatrava, pasado alas-9 sang aga, adlaw sang Sabado, Agosto 3.
Ang biktima ang ginkilala nga si Elisio Cabugnay, 60-anyos, residente sang Barangay Hinab-ongan sa amo nga banwa, samtang ang suspetsado ang ginkilala nga si Jorrey Sayson, 47-anyos, mangunguma, kag residente sa amo nga lugar.
Base sa pahayag ni Police Captain Jesus Alba, Deputy Chief of Police sang Calatrava Municipal Police Station, nagpadulong si Cabugnay sa balay nila Sayson agod magpanukot kuntani sang utang.
Apang nagpamalibad sila Sayson nga magbayad bangod wala pa ini sila sang kwarta, apang sa baylo sang kwarta nga balor sang isda nga utang, magabayad na lamang kuntani sila sang bugas.
Wala nagpasugot si Cabugnay nga bugas ang igabayad sa iya, amo nga nagresulta ini sang paglalisay sa tunga sang biktima kag asawa sang suspetsado.
Gina-alegar nga nakita ni Sayson nga gintamparos ni Cabugnay ang asawa sini, amo nga iya gingabot ang sundang nga yara sa iya hawak kag ginlabo sang makapila ka beses ang biktima. Nasapwan na lamang nga nagahamyangon sa kilid sa kampo ang biktima nga puno sang dugo bangod sa pilas nga iya naagom sa ulo, tangkugo, kag liog tuga sang pagpanglabo.
Ginhingagaw dala sa ospital si Cabugnay, apang gindeklarar ini nga dead on arrival. Nahunong namn sa karun si Sayson sa Calatrava MPS para sa nagakaigo nga disposisyon matapos nga nagboluntaryo surrender sa mga Barangay officials.
