Ginpatawag ni Mayor Albee Benitez ang Bureau of Fire Protection (BFP) kag tagpamuno sang nagkalain-lain nga opisina sa ciudad agod hambalan ang pagtukod sang epektibo nga interventions sa mga fire incidents.
Ini ang kasunod sang sunog sa Purok Kagaykay, Brgy. 2 sang Hulyo 31 kag sa Purok Kingfisher-A, Brgy. 16 sang Agosto 1 sa diin madamo nga pamalay ang ginkaon sang kalayo kag isa ka purok president ang napatay.
Sa nasambit nga meeting gin-presentar sa alkalde ang mga plano kag pamaagi sa pagresponde sa mga sunog sa ciudad particular sa mga red zones ukon fire prone areas nga as of August 4, 2024 nagsaka na sa 195. Diri, ginpahayag ni Benitez nga magatukod ini sang Task Force nga maga-monitor kag maga-develop sa mga plano mapahagan-hagan ang fire incidents particular sa mga red zones.
Ginduso man sang alkalde ang pagbutang sang alarm kag communication systems sa tagsa ka mga purok agod madasig ang pagkoordinar sa mga fire responders. Sa nasambit nga meeting, natumod nga ang electrical ignition, kalayo sa pagluto kag overheating sang mga appliances ang masami ginatunaan sang sunog sa ciudad.
