Nakuha ang P2,500 cash sa isa ka law firm nga nabiktima sang gina-alegar robbery-hold up sa Hernaez St, Barangay 38, ciudad sang Bacolod, las-4 nga hapon, Agosto 6, 2024.
Suno sa tag-iya sang law firm, nga wala na ginahingadlan, isa ka lalaki nga nagpakuno-kuno may i-deliver nga parcel ang nagsulod sa ila opisina. Apang indi kilala sang law firm ang ginapangita sini nga recipient sang parcel.
Naguwa sa law firm ang lalaki matapos ginpaathagan nga indi nila kilala ang iya ginapangita nga recipient sang parcel nga nagabalor sang P10,000. Naguwa man ang tag-iya, kag nagkadto sa pihak nga law firm.
Apang nakibot na lamang nga ini ang gintawgan sang iya staff nga sila ang gina-hold up sang lalaki nga nagpakilala may delivery. Suno sa staff, nang-ukay pa sang drawer kag bag ang suspek apang ang cash lamang sa opisina ang ginkuha sini.
