BACOLOD CITY- May pila ka mga indibidwal nga nakasaway sa nangin akto ni Jose Robello, Deputy Chief sang Bacolod City Traffic Authority Office (BTAO) samtang nagakatabo ang kinagamo sa tunga sang duha ka mga drivers nga naglab-ot sa pagtinapungulay, sa bahin sang 27th Lacson Street ciudad sang Bacolod, sadtong adlaw sang Lunes, Agosto 5, samtang siya ang nagamonitor sang lakat sang trapiko gamit ang drone.
Base sa pagpa-athag ni Robello, antes pa man ang kinagamo, nga nagluntad sa tunga sang mabug-at nga lakat sang trapiko, nag bunggu-anay ang duha ka pick-up nga lunsay padulong sa norte nga direksyon.
Samtang nagahulat sang traffic investigator sang Bacolod City Police Station 2, hinali lang nagpalapit ang isa ka driver sang auto kay Robello, natuhoy sa alegasyon nga ginhampak sang isa ka driver sang pick up nga imbolbado sa aksidente ang ginamaneho nga salakyan nga nagresulta sang pagkagupi sini.
Amo nga ginpadangat sang driver sang auto ang amo nga concern kay Robello nga yara sa lugar, apang ginsilingan ini siya sang deputy chief nga wala sang jurisdiction ang BTAO sa amo nga insidente. Sa tunga sa pag-operate ni Robello sang drone, nakita sa dash cam nga pila ka minuto ang nagligad, nagluntad na ang kinagamo sa duha ka mga drivers.
Ginklaro ni Robello nga ang iya nga focus sa amo nga tion ang mag monitor sa lakat sang trapiko agod mapahibalo sa publiko kag mapadangat ang impormasyon sa head, kag yara man ang presensya sang mga traffic enforcers agod magtambag.
Dugang pa ni Robello, iya ginbaton ang mga komento sang mga pila ka indibidwal sa amo nga hitabo apang iya lamang gintrabaho ang obligasyon nga mag monitor sang lakat sang trapiko pinaagi sa paggamit sang device.
