BACOLOD CITY- Nagapahanumdom ang Bacolod City Police Office sa mga nagapanag-iya sang establisyemento nga mangin vigilante ilabi na sa pag-eksister sang ‘termite gang’ sa ciudad sang Bacolod, kun sa diin ginplano nga sudlon ang Metro Supermarket Sum-ag Branch nga nahamtang sang Purok Providence sa ciudad sang Bacolod, sadtong Miyerkules, Agosto 7.
Base sa pahayag ni Police Colonel Joeresty Coronica, City Director, nga ang ‘termite gang’ ang isa grupo nga nagaigi sa drainage ukon manhole agod makasulod sa establisyemento nga tuyo kawatan.
Nagapati si Coronica, nga mga pangayaw ang may kahimuan sa amo nga krimen apang posible may nagabaton diri sa ila nga lokal nga residente agod mahimo ang plano nga pagpangawat.
Nahibaluan nga may nagluntad na nga kaangay sini nga modus sa pila ka mga lugar sa pungsod kag sa ciudad apang sini nga tuig 2024 isa ini ka panibag-o nga rekord para sa mga kapulisan kun sa diin dapat nga mas mangin mabinantayon ang otoridad amo man ang publiko sa amo nga aktibidad.
Dugang pa ni Coronica, mas ginapakamaayo nga may yara gid sang gwardiya sa sulod sang establisyemento ilabi na ang kaangay sang bangko, mall, kag supermarket agod malikawan ang pagsulod sang amo nga grupo.
