Opisyal nga magabukas ang milling season sang kalamay sini nga tuig sa maabot nga Setyembre 15 apang kalabanan sa mga sentral ang sa Oktubre 1 pa magasugod sa paggaling.
Ginpahayag ni Sugar Regulatory Administration (SRA) Administrator Pablo Azcona nga nagpatunda ang iban nga mga sentral nga indi sila makasugod sa Setyembre bangud alang-alang pa ang tubo kasunod sang nagluntad nga El Niño phenomenon.
Suno kay Azcona, ang dalagku nga mga sugar planters ang nagsiling naman nga sa Oktubre 15 pa nila igapagaling ang ila nga tubo.
Sa sini, ginalauman na sang SRA kag Department of Agriculture ang mahina nga panugod sang galing apang ginalantaw nga amat-amat naman ini nga magasaku sa Nobyembre ukon Disyembre.
Samtang, nagalaum si Azcona nga mamentinar ang maayo nga produksyon sang kalamay sini nga tuig ilabi na nga maayo sa karon ang pagtubo sang mga tubo.
