Nakumpiskar sang Bureau of Fisheries and Aquatic Resources (BFAR) Region 6 kag Coast Guard Station (CGS) Northern Negros Occidental ang 180 kilograms sang golden trevally ukon isda nga badlon nga nakuha paagi sa dynamite fishing.
Ang anom ka boxes sang isda ang nakumpiskar sang BFAR kag CGS NNOC sa Food Terminal Market of Negros Occidental nga nahamtang sa Brgy. 6, Bacolod City, la-1:45 kaina sang hapon kadungan sang on the spot fish examination.
Ginabanta nga nagabalor sang P50,000 ang 180 kilos sang isda kag ini ang gin-abandonar sang tag-iya sa lugar. Ang ginkumpiskar nga isda ang gindala sa Holy Family Homes Inc., Brgy. Cabug, Bacolod City.
Ginatumod na karon ang nag-abandonar sang nasambit nga produkto kag ini ang mahimo nga pasakaan sang kaso nga paglapas sa Sec. 126 sang RA 10654 (Possessing, Dealing or Disposing Illegally Caught or taken fish).
