Gina-target sang nagkalain-lain nga grupo ang 70-80 percent nga transport paralysis sa patigayunon nga strike subong nga adlaw tubtob Huwebes.
Subong nga adlaw, magatingob pwersa ang Kabacod Negros Transport Organization (KNETCO), Piston, BACOD-Manibela, United Negros Drivers and Operators Center (UNDOC) kag Bayan Negros. Suno kay Rudy Catedral, presidente sang BACOD-Manibela, las-6 bwas sa aga, magaplastar ang ila grupo sa flyover sa Brgy. Bata, Magsaysay-Araneta, Libertad extension kag Burgos-Lopez Jaena.
Samtang ang KNETCO magapatigayon anay sang transport caravan sa mayor nga dalanon sa ciudad antes mag-upod sa rally centers. Pagka-hapon magatipon ang mga grupo sa Bacolod City Government Center (BCGC) kag ila luyag nga ma-istorya si Mayor Albee Benitez kag Councilor Al Victor Espino, chairman sang Committee on Transportation sa Sangguniang Panlungsod.
Suno kay Catedral, kun indi mag-atubang sa ila ang mga city officials magatulog ang mga ini sa BCGC kag magapadayon sang ikaduha nga adlaw sang strike sa Huwebes. Masobra 2,000 ka operators kag drivers kag isa ka libo ka units sang traditional jeeps ang maga-upod sa strike.
Ini ang kabahin sang padayon nga protesta sang grupo kontra sa sistema sang implementasyon sang public utility vehicle modernization program sang gobyerno.
